葵涌石蔭路上星期二（18號）下晝突然傳嚟斷斷續續三下爆炸聲，嚇得行過嘅街坊嘩嘩聲。做運輸嘅楊先生當時喺現場做緊嘢，啲爆炸聲就喺佢架車隔離傳嚟，原來係一個伯伯坐住嘅電動輪椅喺行人路行緊嗰陣突然爆炸，伯伯完全唔知驚坐定定，周圍嘅人戥佢緊張，走上去扶佢起身離開輪椅。話口未完，輪椅仲冒煙起火，好彩冇燒傷伯伯同途人咋。

楊先生話嗰陣係下晝4點幾，現場係石蔭路50至54號金石樓對開一條暗斜行人路，當時楊先生見到一個伯伯坐住電動輪椅上斜，行到佢架車旁邊嗰陣突然發出一下爆炸聲，附近啲人都嚇一跳，部輪椅即時停低咗，隔咗10秒左右開始冒煙，但係伯伯好似冇乜反應咁，楊先生同幾個途人即刻走埋去扶伯伯起身走人，伯伯初時仲話部輪椅冇問題，唔願起身，途人再三說服佢先肯慢慢起身行埋一邊。

伯伯一行開，途人嘗試喺輪椅左轆對上嘅電池位幫佢閂咗開關掣截斷電源，楊先生話混亂中都唔知途人成唔成功閂到掣，部輪椅又試冒煙，再嚟一下爆炸聲，在場嘅人都散開。過一陣濃煙消散，伯伯仲坐返落去輪椅度，附近大廈嘅街坊叫佢快啲起身，扶開佢之後，輪椅第三次爆炸，電池位仲着火㖭。

附近金石樓嘅保安同街坊即刻攞大廈支滅火筒出去救火，消防同警察接報之後亦都好快到場，消防員接力再用滅火筒救熄啲火。事件中87歲袁伯冇受傷，消防員初步調查相信係電動輪椅電池短路。楊先生話在場有人問過袁伯使唔使通知佢屋企人去接佢，但伯伯似乎對答唔到，最後都唔知佢去咗邊。而嗰部燒過嘅輪椅就俾人鎖住喺路邊鐵柱。

你敢爆，我敢獎！ 立即WhatsApp《蘋果》24小時爆相爆片熱線 或致電：63836568