噚日，孫柏文講過榮豐投資（063）大玩「財富轉移」，大股東對小股民有如被李國章蹂躪。我亦講過，就算證監同港交所，批准呢啲蹂躪手法，喺有互聯網之後，你做嘅衰嘢，係唔會銷聲匿迹，永遠被互聯網存載。之後只要有人google榮豐大股東嘅名，就會搵到我嗰篇警惕世人同佢哋合作會有乜嘢結果嘅文章。即係話，就算證監同港交所嘅人收唔到佢，Google呢個天收佢。
大家可能會問：「真係得？」我只可以話，噚日篇文章上網之後，到晚上時分，你只要google榮豐董事「鍾斌銓」，「鍾金榜」，「鍾燊榮」，「鍾斌盛」任何一個名，都會喺「搜尋結果」嘅第一頁見到我嘅文章。

google「和黃3」會點？

大家可能會再問：「咁會唔會好快喺結果首頁唔見咗？」呢個問題，最好由和黃公關作答。
因為如果你今時今日google「和黃3」，「搜尋結果」首頁嘅第一個答案，就係我篇讚和黃3好勁，不過批評佢哋九流marketing，題為《和黃3又硬膠》嘅文章，而嗰篇文係喺好幾個月前寫。
試問如果有後生仔女，經過和黃3幾十億元嘅marketing之後，真係上網睇吓和黃3搞啲乜，點知一睇就係我篇文，你係和黃你會覺得點？所以都係嗰句，做衰嘢，出得嚟行，遲早要還。仲要唔係得你要還，因為永遠被存載，之後十年、二十年，你嘅仔、孫，都仲會還。同姓鍾嘅人做生意，google吓先！
金手指網誌：
http://phatdat.blogspot.com