【星期六港區決賽】馮熙淳疑抵觸合約選亞姐 同何紫綸傾去留
蘋果日報 2019/10/28 23:15
亞姐亞洲太平洋國際小姐馮熙淳
攝影：林賓尼、馮嘉銘- 亞姐港區決賽本周六舉行，14位候選亞姐佳麗今晚在九龍城一間食肆試菜。
- 羅霖教後輩要注意台上表現。
- 決賽當點還會進行仁美清叙重組10周年慈善籌款晚宴，仁美清叙主席程瑤及亞姐師姐羅霖都有試菜。
- 馮熙淳在亞洲太平洋國際小姐合約期間參選亞姐，被質疑有抵觸合約之嫌。
- 2號吳玥彤是大熱。
- 6號陳詠欣首次見傳媒，對上一次她要參加新娘化妝考試而缺席。
《2019亞洲小姐競選香港區決賽》將於11月2日舉行，當晚還進行仁美清叙重組10周年慈善籌款晚宴，14位候選亞姐佳麗今晚在九龍城一間食肆試菜，包括仁美清叙主席程瑤、榮譽主席羅霖、1號張可盈、2號吳玥彤、3號黃凱怡、4號周紫清、5號張雯、6號陳詠欣、7號符玉婷、9號潘立詠、10號蘇雙兒、11號康沂、12號馮熙淳、13號羅燕霏、14號范莎莎、15號羅思雅，但8號許嘉欣有事缺席。
身為師姐的羅霖第2次見這班師妹，她即場傳授心得：「我同佢哋講見評判嘅時候盡量表現自己，喺台上面，行錯位或者跳錯舞步，唔緊要，你要記得保持笑容，眼要直望，腰要挺直。問答環節方面，睇多啲常識、國際新聞，着泳衣要保持身材好、脫毛、全身都要護膚，仲有操行分，缺席要有原因。」談及有傳亞視財困，羅霖說：「有留意，成日都聽到，聽到都好心噏，呢個時期各行各業都會裁員，我都有好多工作要取消，所以我都要北上做，希望各行各業都可以捱過呢個難關。」
對於何紫綸早前指亞洲太平洋國際小姐冠軍馮熙淳涉在合約期間參選亞姐，有抵觸合約之嫌，馮熙淳表示：「好多謝亞視邀請我嚟食呢餐飯，其實我今日係以個人身份參加。」已經退選？她續說：「暫時仲考慮緊，因為嗰邊對我有一啲控訴，而家交咗畀律師處理，細節方面我唔講得咁詳細。不過我想表達，我同嗰邊嘅處理情況、言語有少少誤會，呢方面我已表達咗我嘅抱歉，想再次同佢哋講唔好意思。另外我想多謝何紫綸小同亞洲太平洋國際小姐畀我咁好機會，佢哋不嬲都好支持我，好保護我，而家我最希望可以將呢個誤會，三口六面坐低傾一傾商討吓，盡快解決問題，盡快參加呢個比賽，如果到最後佢哋覺得唔能夠繼續，我會尊重佢哋嘅決定。」她表示當時有簽合約，不過未肯透露合約內的條文。問到她參選亞姐前可有告知何紫綸？馮熙淳說：「所以我認喺呢方面處理得唔夠好，我已經同佢哋講唔好意思，抱歉！」
大熱2號吳玥彤希望決賽當晚能夠發揮出水準，她表示現時要勤於護膚：「羅霖師姐教我哋飲多啲暖水、敷mask，因為我哋要着比堅尼，所以皮膚都好緊要，我哋仲有學跳舞。」她認為自己優勝之處是有選美經驗和擁有174cm的高度。
至於缺席首次會見傳媒活動的6號陳詠欣，她透露缺席原因是當日要參加新娘化妝考試，她說：「我本身做化妝，兼職模特兒同演員，不過平時亞姐訓練，我準時出席。」
採訪：黃曉妍