「今朝係我最後一次喺《香港早晨》同大家見面喇，多謝過去咁多年嚟嘅支持，祝你哋以後每朝都有個美好早晨，再見。」就喺呢一句，傷盡唔少宅男心。現年32歲嘅無綫主播女神周嘉儀噚日last day，告別工作十年嘅TVB，稍後變身財金界女強人，唔知會唔會因新形象有更多粉絲？

曾與許方輝傳緋聞

有新工兼且前景咁好，嘉儀BB呢次跳船係好事，難怪噚日着到成個大紅利是封咁主持最後一次《香港早晨》，同朝朝聽完佢把聲先肯返工嘅粉絲say goodbye，更同另一主持陳聞賢鏡頭前握手。佢之後喺facebook貼咗張寫住「主播女神嘉儀BB」蛋糕嘅相，對鏡頭甜笑嘅佢明顯眼紅紅兼有淚光。
嘉儀BB喺03年就讀浸大新聞系時，已經喺無綫新聞部做實習記者，畢業後轉為全職主播，因為清純外表俘虜唔少宅男歡心，但前年同已婚男主播許方輝傳緋聞，令清純形象扣咗少少分，之後被調離《六點半新聞報道》同被休假兩周，當時有傳佢想走人。
八方噚日問過嘉儀BB，佢證實會轉去興證香港做市場推廣，佢話「好多謝觀眾歷年嚟嘅愛戴」，喺TVB亦獲益良多，稍後會先專注金融推廣工作，如果有其他配合形象又合適嘅工作亦會嘗試。唔少佢嘅粉絲則留言話不捨，但亦恭喜佢離開花蟹掌控下嘅CCTVB。

李八方
mailto:[email protected]