韓國女團少女時代（少時）嘅孝淵前日單拖來港，出席今日下晝於銅鑼灣舉行嘅代言彩妝品牌ABSOLUTENEWYORK活動，獲過200粉絲一早於店外等候。

約12時35分左右，穿上黑色短褲晒腿嘅孝淵準時現身，一出場即用中文打招呼：「大家好，我是少女時代的孝淵，很開心見到大家。」港迷即用韓文大叫「我愛你金孝淵」，孝淵即識做地擺出心心手勢回應。一向行開型格路線嘅孝淵，影相時擺出多個心心手勢，不過就似乎因為有啲怕醜，不時掩嘴笑，連主持都話孝淵好嬌俏。

孝淵之後大方分享化韓妝心得：「眼妝好重要，用眼影營造眼神深邃嘅效果，再加條清晰嘅眼線。」隨後其中一名幸運粉絲可以跟孝淵一齊自拍，圍觀粉絲即呷醋大叫。最後孝淵送禮物畀30位粉絲，仲有得分批大合照，港迷當然收貨。

問到孝淵是次拍攝代言廣告有咩趣事，佢話可以試到好多平時唔會化嘅眼妝，覺得好有趣。孝淵又話：「好多人話我笑時好睇，所以我最滿意自己嘅笑容。」問到平時最愛化咩妝，佢話：「望落好似無化妝咁，不過眼神要深邃。」至於對自己素顏有冇信心，孝淵：「呀......有嘅。」然後透露：「少時每個成員都好靚，不過一定要講嘅話，秀英素顏最靚。」仲話以前Tiffany會幫佢化妝。

孝淵提到自己有主持美妝節目，可以跟專家交流，學到好多知識。而之後佢會演出跳舞節目騷舞，又坦言：「如果有機會，都想演戲同演出綜藝節目。」

今次來港，孝淵表示：「想食火鍋，點心同蛋撻。本身喺香港都有好多朋友，今次來港工作可以抽空見面，覺得好開心。」最後不忘用廣東話打多次招呼：「大家好，我係孝淵。」承諾之後會多啲嚟香港。