當年今日

內地邀拍綿羊仔廣告
唐僧梁漢文駕駛鐵騎取經

蘋果日報 2002/01/05 00:00


梁漢文因為在《齊天大聖孫悟空》中飾演唐僧,而被內地一電單車牌子睇中,以六位數字邀他拍廣告,構思是今日唐僧取西經不用行路,改為騎電單車,極盡天馬行空。
張衛健(健仔)、梁漢文(娘炳)、李燦森及Twins等,現正齊集浙江橫店,為劇集《齊天大聖孫悟空》埋尾。梁漢文因為飾演唐三藏而被內地一個綿羊仔電單車牌子睇中,有意以六位數字邀請他拍廣告。

廣告陸續有來
娘炳日前出席《叱咤》頒獎禮後,已飛返橫店續拍《齊》劇。娘炳在長途電話中自爆說:「拍呢個劇對於我打開內地市場好有幫助,𠵱家好多廣告傾緊,其中一個係內地嘅綿羊仔電單車廣告,我好鍾意佢哋嘅構思,話𠵱家唐三藏取西經唔使行路,坐電單車都得,相信接拍嘅機會都好大,我都希望拍得成,到時同劇集一齊出街,效果一定會好理想。」

留意馬騮動靜
此外,健仔在劇中與群猴有多場對手戲,昨日記者透過長途電話聯絡健仔,他笑言小馬騮是他的演戲顧問,健仔說:「有時等緊埋位就會同啲馬騮傾下偈,留意吓佢哋啲動靜,馬騮好有人性㗎,平日同馬騮溝通下,對拍戲會有幫助,但有啲馬騮好曳,一埋位就唔聽話。」
採訪:朱芷瑩