一年一度香港小姐選舉，今日舉行首輪面試，大批參賽者冒雨到港鐵康城站，轉車到電視城進行面試。

歷屆港姐中，好少會有外籍靚女參加，但今日面試中，已經見到有多位外籍同混血兒參加，當中包括20歲，來自加拿大多倫多混血兒Kelly Ng，雖然佢來自加拿大，但就識廣東話。

同場有一位外籍索女Perrie，雖然佢來自香港，但就完全唔識廣東話，佢仲同記者講：「Try my best！」問佢緊唔緊張時，佢就好開心咁話：「very excited！」另亦有一位來自美國Christina，佢都係唔識廣東話㗎！

現場亦見到曾參加亞姐兼時裝設計師施熙瑜現身，原來佢今次係提名咗佢嘅學生參加港姐，佢嘅學生Serena，係中英混血兒，今年25歲，喺倫敦讀UAL時裝設計，仲話做香港小姐係佢兒時嘅夢想。