轉會窗關閉，阿仙奴亦喺日前向英超賽前遞交2017/18球季正式25人名單。因為足踝受傷已經休戰咗近一年嘅西班牙中場辛迪卡索拉，復出時間似乎遙遙無期，喺25人名單榜上無名，換言之至少到年尾都唔可以喺英超比賽上陣。

「卡叔」喺上年10月阿仙奴對盧多格德斯嘅歐聯分組賽受傷，開頭話只係小問題，好快就會復出，點知拖下拖下，搞足一年都仲繼續養傷。卡叔都唔知自己幾時先可以復出：「我唔知道幾時先可以再比賽，但我有信心終有一日可以以最佳狀態返嚟比賽。」