吳鎮宇、張孝全主演、美國福斯傳媒集團投資拍攝嘅廣東話原創劇集《東方華爾街》，今晚喺尖沙嘴一酒店舉行慶功。

鎮宇同張孝全一齊接受訪問，鎮宇話未收到開拍第二季，至於係咪接拍，要睇時間而定。佢話之前都擔心會唔會有第二季，佢話：「今次叫做有交代，可以拍第二季。希望可以一路系列咁拍落去，至於加唔加人工就要問Fox。」

今趟張孝全要配廣東話播出，鎮宇話當日拍電影《迷城》時，都係由導演鄭寶瑞配音，覺得好正。問到孝全下次會唔會用返自己聲時，佢話：「要學多一點點廣東話，都可以講一點點。」孝全話都有睇返，都感覺不太一樣，自己語言天份還可以，不過廣東話就係是太難，都期待想再拍下一季，大家聚在一起再拍應該非常好玩。

身旁嘅鎮宇就話配音員都會加自己情感落去，所以自己聲係最好，佢講到上次為咗入戲同配合造型，佢話：「專登唔瞓覺、飲酒去摧殘自己開工，嚟緊新一輯就唔會再咁做，搞到自己冇覺好瞓。」

精選娛聞，喺晒《娛果》：
http://fb.com/appledailyent