港股以19964完結2006年,單日下跌37點,但全年升幅就非常可觀。呢幾日會有好多專家會做回顧,俊樺今日專心為大家講吓假後嘅部署,原因係炒窩輪只爭朝夕,好多時更只爭分秒。
前日國內電訊股全線異動,昨日得番隻中電信(728)最省鏡,高收4.26元,升5.9%,中電信C輪2137升33%,收62仙,升得比預期略多咗少少,因為引伸波幅升成2%,正股有大成交支持向上破關,下個禮拜二係新年第1個交易日,中電信升破4.40元應該冇問題,破位就推向4.80元,2137可繼續揸。
炒輪其中一個竅門係愈強勢愈啱炒,調整緊嘅正股,收集C輪風險好大,或者應該說值博率唔大,炒輪雖然要講吓運氣,但係就千祈唔好靠晒運氣,因為運氣唔係你同我話事。好似啲保險股咁,中財險(2328)走勢最靚,其他回緊或者整固,遲啲先諗,要炒保險股C輪就要搵中財險嘅C輪入手。