近期蔡約翰是香港馬場的焦點，早一個月還有不少人認定「當家精選」是今屆打吡冠軍，但自該駒上仗1800米香港經典盃因起步失機後追唔切跑第四，開始令人懷疑牠並非牢不可破，今戰還要抽13檔跑2000米，越看越不似贏得。

不過，「當家精選」上次跑第四當日，莫雷拉完全失靈，騎師王捧蛋收場，究竟騎「當家精選」用了幾多成功力值得諗諗！翻看「當家精選」跑經典一哩賽，根本當「星洲司令」及「時時精綵」無到，與其用「一場否決權」來睇低「當家精選」，倒不如當牠上場無跑。

至於「當家精選」十三檔一環，以蔡廐馬近期谷到爆燈，再加上莫雷拉發揮正常時，近乎是全港跑長途及騎外檔馬最佳騎師，似乎又可幫「當家精選」搭夠。

其實「當家精選」兩次不勝，均輸在早段留得太後，相信蔡約翰也會察覺得到，今次抽13檔，如放棄早段留後，立心擺前爭取好位再作打算，反有助「當家精選」跑出最高水準，可期捧走今屆打吡。

葉楚航連續兩次賽事起孖，近期表現出色，旗下第九場二班1200米草地賽的「僥倖」今季4捷，上仗谷草不入三甲，可歸咎早段落後太遠兼直路飛得太出。事實該駒最近跑谷草短途，早段均跟不上，相反之前兩勝田草，取位則從容得多，今次重遊勝路，結合馬房近期強勢，可以再追。