自由黨唯一一位區選女將曾卓兒，今屆喺東區丹拿接捧李汝大，與同樣首度參選嘅公民黨鄭達鴻正面交鋒。該黨人氣王、榮譽主席田北俊早前話過，由於成日幫候選人包括曾卓兒揮手拉票，已經練到「老鼠仔」，仲笑笑口話如果想佢騷muscle，只要畀多啲like佢就可以。

其實網民之後已經爆晒like，田少係時候「找數」。但田少可能都想以最佳姿態示人，今朝再次去到丹拿助選，成朝不停落力同該區選民揮手，確係寓拉票於健身。

而公民黨喺呢個中產區亦有基本支持，若然曾卓兒未能獲李汝大全數過票，則令鄭達鴻有機會突圍，難怪公民黨人氣女王余若薇今日傍晚亦去到丹拿，為鄭達鴻拉票助選。睇見呢區出動明星戰術，可見兩陣營勢均力敵。