當年今日
關於我們

701收料站:航通有留意價值

蘋果日報 2003/09/08 00:00


小初上個周末上咗東莞打波,但天不造美,打咁耐就落足咁耐雨,搞到小初有多少傷風。鬼叫班經紀朋友咁大癮咩,點都要打完為止,小初有時真係懷疑佢哋係咪諗住唔做股票時,轉以打波為生?
不過,家陣個市炒到㷫烚烚,想佢哋轉行就認真難,佢哋家陣重不斷發掘緊未開始大炒嘅股仔,好似其中一個波友就叫吼緊航科通信(1185),皆因佢聽到有大戶想埋班做嘢,如果傾掂數就隨時開車,所以值得留意。
航科通信上星期公布,截至今年6月底中期業績由虧轉盈,雖然只係賺14.3萬元,但已令股價急升十幾巴仙。
波友話,航科通信其實未正式開車,只係一個轉虧為盈嘅消息,已令航科通信股價急升,一則反映個市夠瘋狂;二則反映呢類中資科技股,在市場上有投資者留意。如果有人肯埋班炒作,相信升勢會事半功倍。
小初問隻股有乜炒作藉口?波友話,家陣股仔炒作藉口,基本上都離唔開注資同埋配股集資。
慕容小初