寶威（024）喺半年低位半浮半沉，市場炒落後，逐隻捉，寶威有得諗。寶威主打鋼材貿易、加工，呢期兼新拓展鐵礦石採礦業。單係今年上半年度（6月底止），寶威就大幅度虧轉盈，賺咗5億元（09年半年度虧損2710萬元）。純利當中，雖然包括咗分派聯營公司股份所獲溢利，但主打業務業績改善，係其中一個重要因素。又就當寶威2010年度純利，只係keep到喺上半年數額，預期PE都係得3倍多少少。
再講，寶威新拓展嘅鐵礦石採礦業務，第二座嘅洗選廠亦將喺下個月落成生產，提供咗大規模生產嘅條件。即係話，呢瓣業務最遲應該喺明年度，可以逐步提供收益貢獻，支持寶威純利增長。趁寶威仲喺低位上落，入市博翻半番到0.66元，2010年度預期PE未有耐到雙位數。

首長寶佳博升2成

首長寶佳（103）對上星期上破橫行阻力0.84元，紅籌股當中，寶佳又係落後之極，要搞。寶佳2010年半年度（6月底止）核心純利，大幅增長咗近7倍到7800萬元。集團主打嘅鋼簾線業務，受惠祖國汽車業好景，照計，下半年度繼續肥仔水。保守計數，寶佳全年度純利增長20%到2億元，PE得9倍單位數。呢轉短打，博寶佳升20%到1.09元，預期PE不過10倍。
錢雋