混血女神Leah Dizon曾經紅遍亞洲各地，不過佢紅得快亦跌得快，於2008年自爆奉子成婚後，Leah Dizon立即嚇走大批fans，不過兩年後又宣佈與日籍形象設計師丈夫Bun離婚，繼而疊埋心水撤出日本市場，帶囡囡美蘭返美做單親媽咪。

Leah Dizon雖然已有唔少經歷，但實際上佢只得30出頭，噚日先係佢31歲生日。女神於美國做回素人過平淡生活，間中透過不公開嘅Instagram帳戶晒生活照，生日當天就於Ig上載近照，佢剪髮迎接牛一，仲於Stories上公開一張與鬍鬚大叔嘅親密合照，上面更寫住「this guy is feeding me today」，呢位肥叔仲用面額貼住女神香肩，羨慕死人！其實早於2014年，Leah已貼出同呢位肥叔叔嘅合照，惹來粉絲討論二人是否情侶關係，更有網民指女神擇偶要求超低。