郭富城嘅新作係同周潤發合作演出、莊文強導演嘅電影《無雙》，下個月四號會係香港上映。電影入面郭富城演一名巧手畫匠，可以臨摹像真百分百嘅美金，製成無懈可擊嘅電版。

早前郭富城為《無雙》片宣傳喺紅磡接受訪問，佢話遊走喺戲中角色李問同發哥嘅角色畫家之間。本身就係一個精神分裂式嘅演出，戲末穿橋真相大白時，一句「頂你個肺！」，被形容是神來之筆。

郭富城謂：「要做兩個人嘅極端出嚟，但唔可以太過，要喺最過條線裡面收緊。咁多年嚟，我都調整咗自己演技，不斷反思自己演出，我覺得今次係超越《踏血尋梅》。」郭富城正循發哥戲中金句「凡事做到極致，就係藝術」所講，向「極致」邁進，佢發揮李問嘅角色係︰「沉默中有驚恐，癲之餘又唔可以俾人知佢係癲」。

有欣賞過《無雙》嘅人都覺得莊文強今趟是向80、90年代電影致敬，集大成嘅場面設計，數來就有：
《英雄本色III夕陽之歌》
《縱橫四海》
《辣手神探》
《奪面雙雄》（Face Off）

不過要數到最着痕跡嘅，莫過於金像影帝奇雲史佩西（Kevin Spacey）95年主演嘅電影《非常嫌疑犯》（The Usual Suspects）。

郭富城跟奇雲都喺戲入面，都用盡方法推卸罪責、轉移警方視線，《無》片中「畫家」及《非》片中嘅「Keyser Soze」，都起到關鍵作用。不過郭富城自言未睇過《非常嫌疑犯》。「據我所知，成個《無雙》骨幹係莊文強2008年寫，差唔多10年時間。佢講過一樣嘢，因為佢講過審批過程，知道要用好大budget去拍，冇人願意冒呢個風險，所以寫出嚟之後冇人投資。直到2014年有啲嘢放寬，啲人知道內地可以上，先願意投資。依家版本喺人物上都修正咗，我諗佢收埋好多劇本。」

金像電影《樹大招風》道具領班、人稱道具全嘅張偉全，因為管有23萬張道具鈔票，被控保管偽製紙幣罪罪成，被判入獄但緩刑。佢已經就案件上訴，今個月26號高院會有判詞。

拍戲搞到坐監，都幾悲壯，郭富城稱今次拍《無雙》用美鈔，所以較易處理，佢話：「不過工作人員都好小心，用完都會燒。而去加拿大拍嘅時侯，用假美金緊張好多，不過啲美金一睇就知係假，張銀紙細真嘅20到25%，銀紙個人頭（富蘭克林）歪嘴嘅，總之一睇就知係假，近鏡先用返真銀紙。」阿城半開玩笑咁話，「劇組真係搵咗副凹版印刷機，如果加埋變色油墨，真係可以開工印假美金。」

採訪︰何永寧
攝錄︰沈健程
場地提供: 香港嘉里酒店
Hair : Ian Wong @ii Salon
Make up : 郭艷君
Wardrobe : IT hk

精選娛聞，喺晒《娛果》
http://fb.com/appledailyent