陳淑蘭同Crystal原本係好朋友，2016年仲引薦對方入佢男友利承武嘅飲食集團做嘢，但後來兩姊妹反目，真係說來話長，最初蘭子知道男友餐飲事業要改革，而Crystal喺飲食界好有經驗，所以蘭子就說服佢過檔，咁喺男友身邊多個自己親信都好，後來利承武真係請咗Crystal，的而且確改革後，餐廳生意係好咗，所以蘭子喺男友面前都係立功嘅。

之不過後來有人經常喺酒店飲醉酒鬧事，叫晒餐廳部門主管嚟訓話，又有一次喺酒店法國餐廳晚飯，佢因為覺得餐廳啲嘢食煮得麻麻，專登叫咗隔籮意大利餐廳啲嘢食當外賣送過嚟食。有好姊妹相勸，以免有流言蜚語傳入男友耳中，但有人唔講道理反而嬲咗好姊妹，結果失儀嘅事好快傳到男友耳中，結果成日嗌交成為分手導火線，從此冇乜來往。而分手後，女方為咗面子一直冇公開講，更不時以朋友身份主動搵男方，希望可以重修舊好。

呢幾日陳淑蘭喺Facebook留言講自己引狼入室，日防夜防家賊難防．雖然冇講明係講邊個，但Crystal似乎覺得蘭子係講佢，所以喺Facebook反擊：「陳淑蘭你當了半世人半紅不黑，人格必須是你需要檢討的一個課程，朋友一大堆都被你嚇跑掉…」

《蘋果》頭先打俾Crystal，問佢做乜同蘭子展開罵戰，佢話：「當初佢游說咗我好耐，我先肯幫利生打理隆濤院，咁我係做認真做嘢，搞番好個場，唔係做人耳目。」佢又話當日有人於佢工作嘅餐廳醉酒鬧事，好言相勸，但就俾人記恨。

咁到底利承武同蘭子係咪上年已經分開咗？Crystal話：「呢啲係佢兩個嘅私人事，冇資格代發言，我只可以講利生係一個好老闆，待人好熱誠有禮。唔同蘭子為人，佢真係要檢討下，佢仲話我順手牽羊，又唔清楚件事喺度亂嗡，當餐廳結業時，我將餐廳製冰機攞番屋企，係因為個製冰機其實係屬於Bartender自己嘅，佢後來送俾我，我都有同利生交待過呢件事，但有人矇查查講事講非，鬧成笑話。我希望有人收下把口，唔好再公開亂咁中傷人，我唔會怕你，要鬥我會奉陪底。」

精選娛聞，喺晒《娛果》
http://fb.com/appledailyent