政府即將換屆，港人好唔容易捱過咗五年艱苦日子，有報道話原來過去五年用咗三億公帑養班廢柴高官，呢班問責局長無能卸膊瓣瓣齊，難怪好多人諗起交稅就谷氣。

本來跑馬係唔少港人平衡身心嘅最佳娛樂，可惜家陣馬會嘅競賽董事小組，廢嘅程度拍得住政府，淨係小組幾個核心成員：首席受薪董事祁禮謙、受薪董事韋敦彥、布傑華、郭子貽同廖衍綸，年薪加埋房屋等津貼閒閒哋過千萬，燒鵝嘅價錢連蔗渣嘅味道都交唔到。全港最大非牟利機構馬會，照樣年年高薪養廢人。

普羅馬迷一直知競賽小組好唔掂，容忍始終有個限度，特別係近排「上利多」事件，小組最終裁定蔣嘉琦未盡全力停賽七日。阿妹抗辯失敗洗脫唔到嫌疑，被罰無可厚非，只係普羅馬迷最唔服係小組嘅準則，對個牌仔就擺出無尚權威，對其他外籍騎師啲更離譜嘅騎法就聲都唔敢聲。

小組喺啱啱夜馬前先裁定阿妹未盡全力，點知當晚就即刻畀潘頓隻「文藝學家」剃眼眉。由潘頓連贏兩場嘅「文藝學家」，竟然一改對上兩次贏馬嘅後上跑法，喺快步速下唔搵遮擋留後，搏晒命走去放頭，潘頓果然係前冠軍騎師，冇番咁上下膽識，邊敢用呢種放乾隻馬嘅自殺式跑法？潘頓賽後被問話，話放頭主因係控制唔到隻馬，前冠軍騎師留唔住隻馬，都算聞所未聞，更奇係競賽小組照單全收。

至於潘頓呢場馬唔跟策騎指示留後、對賽事步速毫無判斷、早段點解放棄現成遮擋，小組竟然冇任何質疑，究竟呢班受薪董事係唔識馬，認定大師傅講乜都啱？抑或係偏幫到出面，擺明唔罰外籍騎師？呢班受薪董事咁樣處事，已經應炒魷！

馬會CEO應家柏以前做過賽馬事務執行總監，對賽馬有絕對認識，假若應總坐喺度做受薪董事，睇怕佢都唔會接受潘頓呢啲咁兒嬉解釋。家陣班受薪董事收貨，唔知對識馬嘅應總係咪一種侮辱。假若今次騎「文藝學家」嘅係華將，結果係咪咁順攤？最低消費都被控未盡全力策騎啦。馬會最唔鍾意畀人話華洋有別，但事實澳洲受薪董事更特別照顧澳洲騎師。

仲有史卓豐星期三晚墮馬，星期四朝點解仲畀佢入紙跑今日（11日）賽事？呢啲除咗係條例老化外，亦顯示祁禮謙為首嘅競賽小組無能，你睇一水之隔嘅澳門晨咁早已有例，凡墮馬嘅騎師規定要自動停賽一次，咁做對投注者係一個保障，點解薪高厚祿嘅祁禮謙唔主動去做？

今次競賽小組放生潘頓已經引起前所未有嘅公憤，見到有啲馬迷喺網上話去廉政公署舉報馬會。馬會咪懶老定以為啲人順口開河玩玩吓，只要有一個馬迷嚟真，走去具名舉報，老廉就有理由立案調查，到時香港賽馬就真係醜出國際！

阿Joe