今晚郭富城到圓方出席新片《天亮之前》首映，同場仲有導演吳中天及老闆蕭定一，三人仲拎住代表其中一場戲嘅硬幣擺靚pose。城城受訪時大方祝福舊愛熊黛林覓得如意郎君：「圈裡面無論邊一個辦喜事，我都會衷心恭喜佢，就係咁簡單。我都會祝福佢。」至於講到有網民聲稱在城城51歲生日翌日(即Lynn結婚當天)買結婚戒指，城城就話私人事不回應喇。

首映禮上，城城分享拍呢部戲苦樂同挑戰性，最特別要數親到泰國當地監獄拍攝，又要坐火車，驚險重重。至於生日願望，城城話年年都希望健康：「希望我啦、家人啦、身邊朋友都開開心心，自己工作順利，亦都希望工作上有突破。」

城城又笑言今年牛一已經食咗好多生日蛋糕，禮物方面呢，原來有個歌迷好特別0架：「佢年年都送好大件嘅禮物俾我，前幾年送過潛水摩打，今年就送電動單車。其實同朋友慶祝生日，其實唔使送嘢俾我。自己做咗咁多年人，平平淡淡，踏踏實實咁過已經好開心。」正日同邊個過呢？他笑稱:「反正都過咗去，唔講喇!」