何紫綸主辦選美活動《2018亞洲太平洋國際小姐選舉》香港區記者會在九龍海灣酒店舉行，獲好友包括陸詩韻、趙哲妤、筱靖、莊端兒現身撐場。

何紫綸擔任大會形象總監，陸詩韻任評審，佢話：「睇女仔除咗大方得體，重要有怕怕醜醜先得，因為呢啲係扮唔到，就好似小朋友純真一樣，答問題太老鍊都會扣分。」 何紫綸會聯同今次冠軍到菲律賓拍攝真人show，仲會簽冠軍為旗下藝人，佢話：「因為自己對選美好有情意結，當年參加唔到，都希望將后冠頒俾冠軍。」陸詩韻就話自己選港姐當年24歲超齡，唔能夠代表香港去海外參賽係一個遺憾。

筱靖支持好朋友，佢近日籌辦緊餐廳分店生意，選址喺大圍，原來係自己物業，過往租畀人都係搞餐廳，就不如自己經營。 亞視日前傳出有動盪 ，佢話：「o依家唔係好識亞視嘅員工，自己冇返過去，連吳雨大哥都唔識，不過對亞視重啟係有期望，因為都識得一班有心人嘅舊導演同幕後製作，佢哋都有嚟我餐廳食飯，但都三四個月前，仲話返去見工，不過可惜而家又有動盪。」

莊端兒視何紫綸為恩師，因為當年選珠寶小姐時係對方做評判，莊端兒目前淡出幕前，跟媽咪學投資生意，並報讀咖啡課程，希望實現夢想開咖啡店，另一方面就幫媽咪更進收租、維修、物業工作，邊學邊做。

精選娛聞，喺晒《娛果》
http://fb.com/appledailyent