港足噚日喺晒草灣開操,為下周二主場喺大球場對馬來西亞場亞盃外生死戰做準備,而港隊前日公佈咗最後23名大軍名單,今日就會領取特區護照嘅佐迪、丹尼同列斯奧獲補選入隊,做咗最新入籍兵,佢哋收操後話好期待代表香港出戰,希望幫到港隊。
港足近年有唔少入籍兵,而每次有入籍兵加入都會引起球迷討論,今次都唔例外,唔少球迷懷疑,港足選三件年過34歲嘅西班牙老兵有乜幫助?同時亦剝削咗本地球員嘅機會,不過教練金判坤選得佢哋,當然覺得佢哋幫到手應付對大馬場生死戰。
港足噚日首操即為周四友賽老撾試陣,三件狂牛老兵都係正選,估計好大機會齊齊「地標」,佐迪就話,既然具備代表香港出戰嘅資格,又獲教練選入隊,作為球員要做嘅就係盡力幫港隊爭取最佳成績。