北京愛港人如子，自己唔夠醫護物品，都先送嚟支援特區政府，橋段重感動過粵語殘片。
老董唔識做，永遠慢九拍。當初胡錦濤主席問佢要唔要幫，佢又話唔使，到𠵱家香港疫情好轉，北京告急之際，佢老哥又話要援手，你話啲timing幾差呢。
唉，為今之計，只好先收下禮物，然後急急回禮。以老董同阿松嘅智慧，一定唔敢動用賑災基金，因為佢哋連本地嘅災民都唔出手救。
咁最佳嘅方法，就係叫班男高官出嚟發起一個護幼教育基金（大陸），或者叫田少（田北俊）同棋哥（陳永棋）為祖國募捐，再唔係由愛國愛黨嘅民建聯黨魁曾鈺成牽頭，搞個「全港愛國救災活動」。當然白鴿黨如果夠醒，就應該快啲出嚟同新領導交心，出錢出力，此其時也。


傳真︰2623-9278
電郵︰[email protected]