羅仲謙唔識冧女？你呃人，講大話！

羅仲謙同楊怡早前喺英國秘婚，今日返到嚟香港接受大批傳媒追訪，返屋企冇耐就喺微博到po咗張婚紗相，仲寫住「羅楊怡！謝謝你的愛」。嘩！冠埋夫姓喎，就算佢哋對註冊一事模稜兩可都好啦，其他人都叫你羅生羅太㗎喇！

楊怡都喺微博po同一張婚紗相話「將踏入人生另一階段，謝謝你從此牽著我走......感謝大家對我們的祝福」，真係好sweet呀！

早前謙謙更加被發現ig淨係follow咗楊怡一個，今日淨係講「羅楊怡」呢三隻字，已經冧爆老婆喇，之前仲話唔識o氹女仔喎！所以話，越係話自己唔浪漫嘅人，通常先係最浪漫。

最近有唔少網民表示女友都要求自己學謙謙咁，淨係follow自己一個，你話謙謙你係咪做壞規矩.......