當年今日
關於我們

【名家搶先睇】養樓防老(地產小子)

蘋果日報 2015/12/12 06:00

買樓地產小子養樓防老養兒防老

「GoodMorning!Everyone!我買咗啲日本咖啡,大家喜歡的話可以隨便沖!」「做乜Mary姐咁神采飛揚嘅?佢又升職加人工呀?」「仲使問?緊係佢掂佢男友Charles幫佢畀首期啦!」

行政部大管家Mary姐平時眉精眼企,每日返工有九成時間都係黑面,見到下屬打錯一隻字或者用錯一個標點符號就會大發雷霆。今日突然心花怒放,難免引起同事猜測。雖然Mary姐平時成個大姐款,但她曾經因為家庭問題,導致買樓大計功敗垂成,結果被地產代理和業主連環單打兼羞辱,所以Mary姐一直努力工作,希望三年內晉升至聯席董事,人工翻一番之餘仲享有房屋津貼。另一方面,Mary姐亦努力尋找一個能替她支付首期買樓的男友,雙管齊下,冀盡快置業。

「不過美國就快加息,政府同班專家話樓市有下行風險呢,假如Mary姐家先入市會唔會變做樓蟹㗎?」「係囉!其實Charles都好疼愛Mary姐吖,佢人又好又有幾層樓,將軍澳間千呎新屋都同Mary姐一齊住,Mary姐根本唔使煩安居問題。」

Mary姐自幼失去雙親,求學時期都是半工讀養家,投身社會五年內還清六位數的家庭負債,自己成就自己爭取的她,從來只信自己。為了買樓,Mary姐做足功課,深知香港樓市四十年來升多跌少,也了解政府不會重推租務管制,租樓只會幫業主供樓。她見證着無所事事的二舅如何透過買樓變成小富翁,不時炫耀「個人成就」;亦見證着勤奮上進的大舅縱然努力大半生,但因為沒有買樓而晚年潦倒,所以她一直相信樓市縱有起跌,但長線持有物業對晚年生活總有好處。

「你唔明㗎喇。以前就話養兒防老,家就係養樓防老喇!將來可以按層樓畀銀行,每個月收番筆錢養老,就算市建局或地產商要收購層樓,都好過租樓啦!係咪?」

沖好這杯日本咖啡,再聽罷Mary姐寬容的回應,大家似乎領悟了一個人生哲理。

掌握財經生活資訊,即Like「蘋果ATM」fb專頁啦!
http://fb.com/appledailyatm