還記得英倫高檔百貨公司HarveyNichols喺05年空降香港置地廣場時，個個都話面積太細，難以同其他地方嘅HarveyNichols分店相比。事隔六年，HarveyNichols一雪前恥，喺金鐘太古廣場西武百貨舊址，開咗全亞洲首間旗艦店，佔地8.3萬平方呎，較置地大三分之一，成間舖總投資逾1.5億元。不過相比起英國總店23萬平方呎細好多。

英國貨牌頭唔嘢少，HarveyNichols噚日嘅開幕禮有800位嘉賓撐場，兩位特首疑似候選人梁振英（CY）同唐英年、「正印」特首煲呔、Banker王冬勝、李國寶、地產商大劉都畀面。但係八方留意到，CY入場後，似乎唔係好多人騷佢，逗留咗10分鐘就快閃，唔知係咪返去深水埗，呢啲上等人場合，都係啱唐唐多啲。
開幕禮牌頭十足，有兩位女調酒師，吊喺半空耍雜技同貴賓調酒。該店老闆潘廸生就帶煲呔行咗間店一round。店內分男裝、女裝、童裝、配飾、美容、鐘錶珠寶六個熱點，一定可以畀強國同胞放血放個夠。殿堂級名牌時裝雲集，Lanvin、Balenciaga、Valentino、TbyAlexanderWang、ChristopherKane、Moncler、Bless、Topman……總之水喉足者，不妨到此一遊。

不過，如果買衫買到厭，可以選擇豪買iPhone4套。呢間Flagship嘅iPhone套，個個價錢五位數字。該店推介8個Sellot限量版iPhone4套，選用蛇皮及魔鬼魚皮，並鑲上玫瑰金、半寶石、方晶鋯石及施華洛世奇水晶，夠晒豪氣，最平一個近1.3萬元，最貴近3.4萬元，個套仲貴個部iPhone4，唔見個套，應該肉赤過唔見咗部機。
mailto:[email protected]