深水埗龍悅道昨晚發生奪命車禍，駕駛無載客42號專線小巴司機羅耀通，沿龍翔道往大埔道行駛，至龍悅道近澤安邨一個右彎，疑失控撞毀4米鐵欄再撞壆，鏟上石壆直插路邊草坡，兩輪懸空，羅被救出時重創昏迷，送院搶救不治。死者羅耀通（66歲）在街坊眼中，是個勤力的漢子。他除了是駕駛小巴的替更司機，還在澤安邨麗澤樓開設洗衣店，又在附近開報紙檔，日做三份工，有街坊獲悉他因交通意外去世，無不嘆息，坦言難過。

羅耀通出事時駕駛42號線小巴，該站頭小巴司機表示羅做替更，不是經常開工，但多數返下午更，昨晚出事時間應是收了工。而羅在富澤樓地下開設的洗衣店，今晨並無開舖，附近店舖職員表示，羅有妻子及一名20多歲兒子，兒子間中到洗衣店幫手，「知佢（死者）好勤力，又看舖，又去揸小巴。」

除了洗衣店外，羅亦在附近經營報紙檔，在其鄰近開設辦館的區女士說，從街坊WhatsApp群組中，已獲悉羅的死訊，坦言「好唔開心，佢好勤力㗎！朝早用自己嘅客貨車送報紙去筆架山，仲請咗個人幫佢手，跟住就返嚟開洗衣店，洗衣店做咗8年，下午收舖後就去揸小巴。」區女士早年曾坐過羅駕駛的小巴，感覺他駕駛速度正常，她又不時幫襯羅的洗衣店。「佢唔食煙，唔飲酒，都算健康，係肥啲，有肚腩，不過，唔知係咪唔夠精神，疲勞過度，或者唔知係咪冇戴安全帶而撞車呢？我個心都好唔舒服。」

----------------------
【撐學生】
召集有心人 撐學生全年睇《蘋果》
立即按此
----------------------
《囚牢之疆》 專頁
揭開集中營邪惡面紗
今日新疆 明日香港
----------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568