韓國天王Rain同女友金泰希自從2013年被爆拍拖後，兩人感情好穩定，日前佢哋就被爆靜靜雞飛咗去濟州島旅行三日兩夜，由於當時報道有指同行仲有Rain嘅爸爸，以及金泰希嘅屋企人，所以令外界誤會今次旅行係家庭旅行，雙方拉埋一齊傾婚事。

不過金泰希所屬事務所就承認二人去咗旅行，但否認雙方家長有同行，強調唔係為婚事嘅見面禮。

據知Rain同金泰希經過幾日甜蜜旅行放假後，已於噚日結束濟州旅行，並已返回首爾。而Rain噚日亦上載新相到Instagram，並為佢下周二同三喺日本東京嘅演唱會宣傳，約定日本嘅粉絲。只見照片中嘅Rain容光煥發，似乎同女友去旅行休息叉完電，過咗一個又滿足又開心嘅假期。