現年26歲嘅港姐許亦妮一向是非纏身，早前被影到撻着有份投資電影《喜愛夜蒲3》嘅有米高層盧啟邦（Andrew），被封「是非精」嘅許亦妮早前因為DaDa(陳靜)唔拍《喜愛夜蒲3》，許亦妮就「執兩攤」做女主角，但有人即擺款，被指拍戲恰人搶衫、扮大牌，劇組批評佢係「犯眾憎」(新聞連結： http://bit.ly/180ayad )。

不過上年有指Andrew原來有正印女友，許亦妮結果極速被狠飛( http://bit.ly/1FY6KFa )，更指許亦妮態度唔好，嚇怕廣告客戶，所以連商演都冇得接。

今日有雜誌表示，許亦妮早前拍完《喜愛夜蒲3》做女主角，疑自覺「升呢」，返大台開工，又唔跟稿及玩遲到，針對拍《街頭魔術王2》嘅拍檔陳嘉寶，前年拍《老表，你好嘢!》因成日晒凸眼，演技浮誇，被網民圍插。不過許亦妮前年「主動」去咗綜藝科余詠珊嗰邊，當時余詠珊都睇好許亦妮，見許亦妮又玩得、又唔怕行性感，余詠珊先俾佢上綜藝節目賺騷錢，收入都冇憂嘅!

不過雜誌指有人疑恃寵生驕，向大台「獅子開大口」。大台一向人工奀就眾所周知，上年「民選港姐」陳凱琳有傳底薪得8千蚊，仲被要求簽長約，反而11年當選季軍嘅許亦妮就身在「福中不知福」嘞!底薪有成萬二蚊簽佢四年，另再計5百蚊一騷，又有經理人合約喺手，據知許亦妮曾向余詠珊提出今年8月續約，要求加薪4倍，即4萬8底薪，另加到1000蚊一騷，佢更同余詠珊講，如果唔肯加人工就唔續約。

據悉，余詠珊就拍枱鬧爆，勒令停薪留職，叫佢諗清楚係唔係想解約，加上又被爆工作態度差成日被投訴，由上年聖誕開始，許亦妮被大台掟入雪櫃，事後知死嘅許亦妮同阿媽返大台求樂易玲幫佢，睇吓有冇「彎轉」。

今午兩點左右，許亦妮更新微博，話：「堅持一個人的夢想，要麼支持到底，支持一半，或模棱兩可的支持其實令對方很痛苦。」張圖就係一張望海相，未知有咩意思？