鄧紫棋（G.E.M.）今日身穿早前喺巡迴演唱會着過嘅其中一條開胸寶藍色長裙現身山頂蠟像館，同館內佢嘅蠟亦換上另一條紅色演唱會服飾，為咗宣傳一項慈善合作，只要大家手持佢喺紅館演唱會派發嘅蠟像館優惠劵入場，蠟像館會捐出部份收益作慈善用途。

企喺三年前度身訂造嘅蠟像隔籬，G.E.M.笑指當時臉部仍有Baby fat，身型冇大變，講到今次演唱會第一套服飾，佢表示遵守大愛承諾，喺胸口開出心型大窿，問到會否擔心焦點放在胸口上？佢話:「唔會，係配合輔助到個演唱會。」其他服飾各有各靚，例如彈琴著嗰條係高叉大露背。

雖然演唱會將至，佢透露毫無忍口，上月生日期間放縱食蛋糕，但結果竟然瘦咗，講到男友Mark送上紅玫瑰兼拎紅酒上佢屋企慶祝？G.E.M.甜笑話:「有收到花，唔講邊個送，我私人嘢唔講啦。」至於好姊妹何超蓮被指同楊政龍拍拖？G.E.M.出奇反問:「咁攪笑，係咩！我連報導都唔知，等我問吓佢。」G.E.M.表示以佢所知超蓮仍然單身，除非隱瞞佢，如果咁就三個月唔同佢講嘢。