17歲日本偶像橋本環奈靠可愛外型成為廣告商新寵兒，可惜橋本環奈成為搶手貨卻冇帶挈所屬女子組合Rev. from DVL，發展至今未有其他成員可以脫穎而出，只得橋本環奈成績一枝獨秀。

橋本環奈近年亦深受片商歡迎，由佢擔正做主角嘅Reboot版電影《水手服與機關鎗-卒業-》於亞洲各地上映，最近又接拍翻拍自人氣動漫嘅真人版電影《銀魂》，拍住男主角小栗旬合作，仲同尊尼男子組合SexyZone成員佐藤勝利合演青春愛情片《春&夏事件簿》，故事係翻拍自初野晴嘅人氣小說，全系列已賣出56萬本，料兩片上映後令橋本環奈嘅人氣再下一城。

橋本環奈被形容係「千年一遇美少女」，憑住天使面深得少男歡迎，雖然事業處於搏殺期，但原來橋本環奈冇打算為工作而放棄學業。日前橋本環奈就於Twitter上留言表示，目前正為升學作好準備，為考上大學先行備戰，得知佢會於明年開始展開大學生生涯。