相信唔少朋友都曾經用過Aiwa（愛華）的音響產品，當年的卡式機、CD播放機同迷你HiFi都有唔錯評價，不過自2002年被Sony收購後，品牌好快就做唔住，2005年停止開發新產品，到2008年Aiwa這個品牌更正式被除名。

事隔十年後，終有白武士出手打救，日本十和田Audio在今年年初取得Aiwa品牌使用權，4月成立Aiwa株式會社，剛剛宣佈會在今年秋天再次推出Aiwa牌子影音產品，對象是日本國內用家。首階段Aiwa復活計劃公佈的新產品種類相當多，例如有DAP音樂播放器、藍牙喇叭、CD收音機、CD卡式機及黑膠唱盤，令人意想不到竟然會出埋4K電視，暫定會推出24吋、32吋、43吋、49吋及55吋共5種尺寸，並會以平價策略出擊，如DAP音樂播放器預計定價只是19,800日圓（約$1,385），而55吋4K電視亦預計只賣138,000日圓（約$9,655）。不過大家都應該估到，價錢做得咁低都不會是「Made in Japan」，廠方表明會跟中國代工工廠合作生產，唔知可唔可以殺出一條新血路呢？

資料來源：AV Watch
記者：布偉倫

2017果籽繼續認真知味。識買惜用。行以求知。好事多為。重修舊好。
緊貼果籽報道，即like： http://fb.me/AS.AppleDaily