美國電影大亨Harvey Weinstein爆出性醜聞，荷李活名導奧利華史東（Oliver Stone）日前被問到有關呢單性騷擾事件時，佢話人被判有罪前都係無罪，意下之言即撐Harvey，即惹來外界批評。

曾任《Playboy》女模嘅Carrie Stevens即鬧爆奧利華，佢透露曾遭奧利華胸襲，形容奧利華同Harvey蛇鼠一窩。另外，金像女配角柏翠茜亞雅奇（Patricia Arquette）亦指奧利華曾想向佢埋手，柏翠茜話幾年前奧利華曾經想搵佢拍戲，影片圍繞性愛主題，之後佢又收過對方嘅花束。其後奧利華又請佢睇首映，柏翠茜覺得有啲怪帶埋男友去，奧利華就質問佢點解帶埋男友嚟，從此之後，奧利華就冇再搵過佢。

奧利華於受到猛烈批評之後，喺社交網站留言指自己一開始冇留言相關報道，但經過呢單醜聞連日來被廣泛報道之後，已了解事件，佢讚揚企出來嘅受害人需要好大勇氣，同時佢亦宣佈取消同Harvey旗下公司合作嘅劇集。