韓國樂團Royal Pirates嘅29歲前成員James，曾於隊中擔任低音結他手，不過大前年佢跟朋友食飯時遭餐廳嘅門壓倒，造成左手腕組織壞死，James被迫放棄彈結他及退團，去年更因病情惡化而險需左手截肢。

James隨後返回美國居住，未有放棄希望及音樂嘅佢，早前於Kickstarter發起眾籌，獲大批網民支持，有望即將推出首張EP。積極面對生活嘅James近日接受《蘋果》訪問，坦言意外發生後一度想過輕生，又透露左手嘅康復進度，以及目前仍要面對嘅困難。

James表示意外發生後，係宗教信仰幫佢度過難關，當時佢覺得係神從意外中拯救咗佢，不過亦坦言：「我嘗試保持正能量，當然，曾經有幾個時刻我想過放棄生命，但好慶幸我現時仍然活著。」James亦透露即使已退出Royal Pirates，仍有跟舊隊友聯絡。

意外發生時，其親人仍遠在美國洛杉磯，當時James非常依靠叔叔及阿姨、事務所及朋友，James非常感謝佢哋嘅支持，又表示：「當時我跟粉絲隱瞞真相，因為唔想傳播悲傷，不過現時有咗呢個眾籌計劃，我終於準備好繼續前行。」

「當時醫生叫我做好要截肢嘅準備，但最後能夠立即駁回左手。一開始我嘅身體拒絕我嘅手，我唔可以移動我嘅手指，而且皮膚開始腐爛。」James失去彈結他嘅能力，而且目前仍未康復，佢表示：「更糟糕嘅係，你失去做日常事物嘅能力，例如着鞋、着衫等，呢啲真係會磨滅一個人嘅自信及身份。」

「第一次手術令血管太緊，所以我嘅手變成紫色，而且體積增大咗一倍，嗰種痛苦係令人難以忍受嘅，感覺好似真係要爆開一樣。第二次手術係切開皮膚，令血液流出，咁樣我嘅手就唔會爆開。第三及第四次手術包括移除及增添釘同外部固定器，第五次手術係肌腱轉移，但不幸地唔太成功。

James說：「每個醫生都表示最後我要做一個手腕手術，我盡量拖延呢個手術，因為係個好糟糕嘅手術。」據知手術後James身體表面上已經癒合，但其實骨頭仍在腐爛，換言之，James嘅病情正隨時惡化，佢亦表示：「所以現時我專注於心理健康上。」問到有否想過出書勉勵其他人時，James表示暫未有相關計劃，目前正專注於推出新碟。

最後，James提到現時韓國嘅演藝界競爭非常激烈，因為好多人都想成名，形成一個最強大嘅人先可以生存嘅環境，需要付出艱辛嘅努力，先可以於圈中取得成功。

更多韓流，喺晒《娛果》
http://fb.com/appledailyent