黃貫中(Paul)、夏韶聲、單立文(豹哥)、鄧建明(Joey Tang)、恭碩良演出嘅《搖滾大俠奏》演唱會，噚晚喺紅館完成尾場演出，有滕麗名、江美儀、盧凱彤、馬海倫、鍾舒漫、彭建新、胡楓、盧敏儀、孫敬安現身捧場，Paul太太朱茵仲帶埋囡囡黃鶯現身，現場見朱茵右眼眼白好紅，似爆咗微絲血管。

5位歌手延續首場落力嘅演出，除咗演繹各自嘅作品外，仲有U2、Prince，Eurythmics等外國樂團嘅經典。嘉賓方面繼續有豹嫂胡蓓蔚，同豹哥合唱《下雨天》外，演唱會尾段Joey Tang更用上Deep Purple嘅Highway Star作結他Solo，興奮彈到碌地，仲High爆到爆粗大嗌：「真係好X Rock呀。」

Paul囡囡黃鶯亦都驚喜現身台上向爸爸獻花，Paul個樣有啲嚇親，要等一陣先至回到神同觀眾介紹：「我個女呀，同大家打個招呼呀。」黃鶯就好淡定咁對住咪講：「大家好。」獲台下一片掌聲，臨走前仲錫錫爸爸。身邊嘅豹哥就話：「估唔到阿Paul平時咁Rock，見到個女成個鵪鶉咁。」Paul就話：「係呀！你話我乜x都得㗎！佢係我老闆呀。」

完騷後5人出席慶功宴受訪，對今次演出大感意猶未盡，問到Paul係咪事前唔知囡囡會上台？佢話：「真係唔知，我老婆同個女去咗美國今日先返嚟，我都估唔到佢上台咁淡定。」至於豹哥就係第一次同太太同台唱歌，佢話：「我一向都唔鍾意唱歌，淨係鍾意幫人哋彈，但我覺得佢值得有一個機會期上嚟紅館，佢真係一個好好嘅歌手。」

佢哋都話希望下次有機會再合體開騷，到時可以各自攜眷上台齊齊Jam歌，Joey就話原本個仔都可以嚟，不過佢呢排考試，所以要專心讀書，而夏韶聲就話：「孫仔今日都有嚟睇，但我冇問過佢上唔上台。」問到恭碩良會唔會下次請埋女友林憶蓮上台？佢話：「我之前出席戶外音樂節都帶晒全家去，包括兩隻狗同女朋友，O依家佢放緊假陪緊個女，其實佢都好Rock得，下次有機會肯定會帶佢嚟。」

精選娛聞，喺晒《娛果》 http://fb.com/appledailyent