為咗阻截武漢肺炎疫情爆發,特區政府之前就宣佈對嚟自中國嘅入境者實施「隔離令」,若果由內地返香港要強制隔離14日,一般人見到隔離令多數都會避免到內地,點知新民黨主席葉劉淑儀噚日竟然漏夜去珠海,仲過咗一晚夜,今日下午返香港接受強制隔離。
葉劉周三晚喺Facebook話,噚晚因急事去咗珠海一趟,返香港嘅時候已簽署由衞生署發出嘅強制檢疫令,意味佢由今日開始要在家自我隔離14天,直到下月1日先可以復出同出席活動,佢已經知會立法會同行會,其間會喺屋企處理公務,如常工作。
八方問過葉劉去珠海原因,佢只係話私人理由,唔方便透露,總之就係噚晚有急事所以過咗去,今日5點幾返香港,住咗一晚酒店,同佢同行嘅司機都要家居隔離。近日新民黨嘅「急事」,可能係容海恩與李梓敬之爭,為盡快擺平風波,唔好令立法會選舉多生枝節,葉劉匆匆北上與重要人物講數,可以理解。八方亦不排除有更「緊急」嘅事,始終葉劉都俾777向北京篤過背脊,上去解畫或反打「小報告」都好正常。
佢話喎,去到珠海覺得「風涼水冷」,認為內地疫情已經受控,加上自己接觸咗好少人,唔擔心受感染。
至於隔離14日有咩做?出咗名係工作狂嘅葉劉話會繼續在家處理文件,又叫同事照樣send嘢畀佢,另外佢都download咗政府檢疫App,每日量體溫,同埋報告身體狀況。
-----------------------------
【武漢肺炎】專頁 全民自救 抗疫資訊盡在《蘋果》
-----------------------------
【撐學生】
召集有心人 撐學生全年睇《蘋果》
立即按此