楊崢同黃宗澤的姊弟戀，來得快﹑分得仲快，楊崢日前已請假「潛水」冇返商台（不過明天出席公開活動），而部仿古車亦被收回，睇嚟佢同黃宗澤（Bosco）嘅戀情真係凍過水，似乎唔多有未來，其實最重要係，楊崢過唔到黃宗澤媽咪嗰關。

今日有雜誌報道Bosco媽咪，嫌棄楊崢比乖仔大足9年，加上負面新聞大堆，「貪崢」形象浮現，黃母更因而同Bosco鬧大交，而報道中有知情人士表示，Bosco媽絕到鬧爆個仔：「你0依家有兩個阿媽，冇咗我呢個，仲有佢（指楊崢）做你阿媽！」今次真係弊弊都冇咁弊喇。

車已還、假已請，報道話早前係楊崢43歲生日，不過Bosco並冇同佢慶祝。日前Bosco去澳門出席活動，當晚Bosco同記者做訪問時，都有少少忟憎，叫大家比啲空間佢哋。

原來自從同杏兒甩拖之後，Bosco媽一直想撮合乖仔，同一名叫Tina嘅內地富商千金一齊，不過一直未成事，但係突然間就爆出阿仔同楊崢拍拖，仲有埋咀嘴相「證實」。

Bosco媽嬲到同一向孝順嘅乖仔開片鬧交，報道又話Bosco仲聽到唔少老友嘅報料，將好多比傳媒報道更「精彩」嘅楊崢故事話比Bosco知，考慮之下，最後Bosco都係考慮分手算數。