吳京自導自演嘅《戰狼2》上映12日，截至今日4點，累積票房已經有32.7億人民幣（下同），睇佢個走勢，今日收過33億人民幣應該冇問題；如無意外，聽日就可以打破周星馳部《美人魚》所保持嘅34億人民幣票房冠軍紀錄，成為中國史上最賣座電影！只用13日就可以刷新破票房紀錄，真係製造咗神話出嚟，而且以呢部戲嘅氣勢，估計埋單可以收到40億人民幣。

聽講吳京用咗約1.2億嚟拍《戰狼2》，後來再以2億再議價引入光線、萬達、阿里爸爸同鄧超入嚟，單係吳京一個人就佔部戲40%股份，聽講鄧超係最早期投資人之一，當時唔係咁多人睇好投呢部戲，而佢為義氣撐吳京都投資咗15%，鄧超今次真係好心有好報，乜都唔使理就賺幾億。