話咁快谷草夜賽今次係季內倒數第三次，揀馬應該循邊個方向？繼續跟進贏開有勢頭馬？抑或追人？自己會偏向博一些轉倉未交代，而動態顯示趕住標尾會的馬。

周三（21日）晚有三匹此類馬，苗廐「鋒芒畢露」年初轉到苗廐後跑六場得兩P，反映馬房在等有利形勢下交代，始終「鋒芒畢露」評分上唔算太有利，必須要有好檔位及對手出差錯配合下才有勝算，今次抽2檔啱數。

第二匹可以博係「滿載而來」，上仗轉到沈廐後初戰同程，由於排10檔走勢只點到即止，旨在摸清馬本身斤兩，在古怪步速下只輸兩個多身位，演出絕對收貨，匆匆再報相同路程。

翻查在港兩次上名中有一次正是此程，評分由來港77分落到現分46分，應有一定反彈空間。

第一場「樂有盈」情況亦相同，轉投賀賢後揀谷草作首戰，雖在港從未上名三甲，但翻查季內仍在文廐時，曾於四班谷草短途輸近，如今居五班好明顯係捨難取易。