中環嘅夜色本來已經好靚，噚晚嘅中環愛丁堡廣場更加格外閃閃生光，因為現場有近2,000個燈泡矗立，隨意閃動，市民走入其中，變成若隱若現。燈泡為乜配合「光．明．頂」行動，率先佔中？查實呢個係國際著名媒體藝術大師Jim Campbell嘅名作品《Scattered Light（晃光）》嚟㗎，因為由藝發局主辦、城市大學創意媒體學院統籌、康文署藝術推廣辦事處協辦嘅「流光曳影」活動，請咗Jim Campbell幫手。

《晃光》會喺今日起至10月1號、傍晚6點至晚上11點喺愛丁堡廣場展出，美國駐港總領事夏千福噚日都有去睇呢場「佔中」盛會。