疫下的聖誕，樂瞳會靜靜宅在家度過：「聖誕冇得出街，會約埋屋企人聚吓，簡簡單單煮吓大餐，珍惜同家人相處嘅時間。呢一年好多地方去唔到，幾個月前，以為聖誕可以出吓關，點知都要匿埋喺屋企，希望疫情快啲過。」過去一年，各行各業都受疫情重創。娛樂圈更甚，樂瞳全年演出近乎零，幸好年初時開了網店賣紅酒，投資6位數字亦已回本。

「本來我都有啲演出，不過，身體唔舒服推咗。」樂瞳說。她去年曾在訪問中提到2018年發現患上子宮內膜異位（俗稱朱古力瘤），有時會痛到嘔，她說：「醫生話暫時可以唔使割，但要小心注意，我受荷爾蒙影響到生理期，成日都唔準，又會唔舒服，呢個病令我學識慢活，盡量唔好令自己有壓力，保持輕鬆心情。今年大家都過咗艱辛嘅一年，相信每個人受疫情影響，心理同生理上都有一定衝擊，大圍情緒唔多唔少都一定有少少抑鬱。」

樂瞳也慨嘆演藝圈講際遇，她表示從來最怕開口向監製𢯎撈：「叫人畀個角色我真係好難啟齒，反而我賣酒仲易，我可以帶支酒出嚟，以酒會友，大家交流吓會舒服啲！」

這一年世界各地不停封關，大家避疫也不敢出埠旅遊：「以前我好多時每個月都有機會離開香港，無論去工作或自己出遊，飛咗出去，就好似釋放咗壓力，睇見外面嘅世界好大，唔好嘅嘢都會放低；而家成日都匿埋喺屋企，唔多唔少都會有負面情緒，多嘢諗咗，我會多咗擔心自己未來工作，壓力亦會多咗。」樂瞳盡量不鑽牛角尖，她自爆減壓會攬着愛犬：「寵物好簡單，你畀嘢佢食，佢就好開心，見佢開心，我都會開心。」

問到樂瞳為何是攬狗，而不是攬着honey？向來不乏裙下之臣的她卻答：「我冇honey，不嬲都冇，成日話『事業得意，情場失意』，疫下我成日匿埋屋企，自己個人都『摺埋』咗，自己都驚。」樂瞳謂避疫不敢到處去：「而家地球好危險，我唔會隨便去人哋屋企煮飯，熟先可以去。」過去一年避疫，34歲樂瞳自爆「冰封」感情：「無限期閉關，我都『封關』變宅女。」樂瞳不介意冇拖拍，現在她寧要事業不要愛情：「我越嚟越覺得女人嘅安全感嚟自事業，自己事業好啲，滿足感大啲，又可以畀屋企人同自己好少少嘅生活。如果仲未嫁到，我有諗過不如先考慮買間姑婆屋畀自己終老。」

樂瞳聖誕想收甚麼禮物？她說：「邊個女人唔鍾意收禮物？今年聖誕大家平平安安，身體健康，身邊朋友唔好『中招』就好喇！」至於又會給友人送出甚麼禮物？樂瞳即答：「送吓我賣嘅酒同飛吻畀大家。」

撰文：比華利
攝影：林德雄
攝錄：馮嘉銘
場地：Rehab
服裝：MZ JJ

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！