人民幣一路升值，資金就一路入市，市場預期人民幣明年起碼會升值5%，股市亦會係咁升，欲罷不能。
港股回氣後，噚日又再掉頭急升，恒指收18944，大升241點，期指更大升326點，重上19000大關，高收19072，大高水128點。最犀利係國企，幾下手勢又上番高位，H指收市8758，又高過上月23日的8623，而日中高位8762，亦只係相差34點，氣勢如虹。
短期而言，恒指仍會在窄幅內上落，預期範圍係18500至19300，整固完成後，大市升浪再起，國企股肯定係火車頭，恒指明年上半年有機會上見22000。
人民幣持續升值對中資股大多有利；航空、零售、地產、保險等以人民幣為主要收入及以內地資產為主的，通通受惠，地產股升勢已熱火撩天，航空股亦已高飛，至於港口股暫時仍未發力，可以重注出擊。
廈門港務（3378）走勢好靚，由今年4月開始，形成一個大圓底收集形態，而嗰支「柄」亦已做咗個多月，噚日已有破位而上之勢，MACD亦將出現雙牛入貨訊號，只要確認衝破1.97元阻力，以圓底形態衡量，照度上去，最小升幅目標係2.40元。

07年盈利可大升

廈港係廈門最大港口碼頭營運商，去年12月以每股1.38元上市，1年時間，現價升幅只42%，落後頗多中資股，而同今年初的高價2.375元相比，亦係落後一段距離。
噚日收到料，話廈港短期內會注資，股價亦會有所動作。廈港旗下碼頭有13個泊位，現時起緊3個新泊位，其中2個明年中完成；至於熱門的注資項目，係母公司與丹麥公司合作（各佔半數權益）的嵩嶼集裝箱碼頭3個泊位。注資後，連同本身新泊位投入運作，廈港07年盈利又可大幅上升。
郭兆誠