韓國「國民妹妹」IU近日正忙於出道十周年嘅巡迴演唱會，早前喺首爾場嘅演出更獲其偶像、男團god擔任特別嘉賓，令IU非常開心。而今日就有報道指，IU將再度與偶像合作，為god嘅新碟featuring，亦係雙方繼2014年後再合作，令粉絲大表期待。

而IU今年憑劇集《我的大叔》獲頒多個演員獎項，今日亦有報道指IU將再拍攝新劇，有望演出知名編劇洪氏姊妹嘅新作，據悉新作將喺tvN收視台播出，並由韓劇《當你沉睡時》嘅吳忠煥導演執導，不過IU方面回應表示：「的確有收到提案，但仍然係討論中，未落實演出。」

另外，IU將於本周六(8號)巡到香港開騷，至於IU嘅韓版《步步驚心》拍檔李準基早前亦宣佈將舉行亞洲巡迴粉絲見面會，今日透過官方網站宣佈將於明年3月10號訪港冧粉絲。

精選韓流，喺晒《娛果》
http://fb.com/appledailyent