今年係湯寶如入行25週年，今日佢喺尖沙嘴舉行記招，宣佈11月15日假Star Hall舉行《湯寶如獨愛音樂25週年演唱會香港站》。喺記招上，湯記指會將紅館舞台、燈光效果搬到九展，唯一要求係舞台唔好有樓梯，因為5年前，佢演唱會嘉賓黎瑞恩喺舞台樓梯跌倒。最後，大會送上一套靚音響俾畀湯記回家細味25年嚟好音樂。

暫時只開一場，湯記個人意願亦係一場，佢話：「原本今年想做歌先，等明年後年先開，不過唱片公司話今年係25週年，我自己都唔記得，其實到3月都冇期，呢個係後補期，我希望紅館做，做埋今次再入紙紅館，不過唔會再叫咩週年。」湯記笑指年份數字已經唔重要，相信周慧敏開埋30週年都唔會再提數字。

湯記透露未來想同唔同嘅男女歌手合作開騷，互唱對方嘅歌，由於身邊姊妹們一係唔唱，一係忙自己開騷，所以佢傾向同男歌手合作，佢話：「o依家想透過大家介紹好男人俾我crossover。」

講到嘉賓方面，暫定有黎瑞恩同陳曉東，湯記笑指叫晒咁多年朋友上台會變成群星演唱會，但一定會請寶麗金同事嚟睇。另外，湯記話由於今個月忙宣傳，同10歲大囝囝見面都冇24小時，佢話:「佢有投訴媽咪，我叫佢到時嚟睇，佢話返學點睇，估唔到最難攞個期係佢。」平時佢為免影響母子關係，所以將教功課責任交俾其他人。