美國八卦網站《TMZ》近日爆料，NBA球星勒邦占士（LeBron James）周二突然喺洛杉磯出沒，同老婆莎雲娜喺Notre Dame高中現身，據悉呢位騎士前鋒仲同班學生一齊操練㖭。

唔少球迷都覺得占士同老婆係想幫12歲嘅囝囝小占士搵學校，因為Notre Dame係當地最好嘅私立高中之一，而且距離占士喺比華利山嘅豪宅，只係需要20分鐘路程；但都有唔少湖人球迷好興奮咁話明夏約滿騎士嘅占士，有機會係想以自由身轉投「紫金兵團」，所以先考察當地嘅學校，安排屋企人過嚟洛城喎。

不過，占士事後就喺twitter發佈短片，話自己只係咁啱喺附近拍完廣告，所以先會問Notre Dame高中借場地練習，佢仲話希望自己可以影響到一班學生，令佢哋更有動力爭取進步。