係人都知道前特首董建華好勤力，在任時更獲封為「7-11」，即工作時間朝七晚十一，而且當時有唔少大想頭，否則點會有咁多乜港物港嘅大計？雖然年屆78歲，阿董卻自爆依然鍾意諗嘢。

佢接受新一期中總刊物《商薈》訪問時透露，每朝6點半就開始工作，直言「上午是我的思考時間」；強調年紀大咗咯，實質嘅工作可以交畀其他人執行，「但方向理念這些大前提，我一定要想通想透，為何做？思考問題的時間是非常珍貴。」

成朝諗完嘢之後，做乜好呢？阿董話下晝通常會見唔同界別朋友聽意見，每日見成六、七批（嘩，咪仲忙過特首？），夜晚會有應酬，但一星期盡量三、四晚留喺屋企陪家人。

相信阿董諗嘅嘢，大部份圍繞佢成立嘅「團結香港基金」；訪問中佢亦提到國際上對智庫機構有評級，100強智庫中，美國嘅智庫最多，中國都有幾個，長遠希望「團結香港基金」5至7年後躋身世界100強喎。