今年60歲、被高志森尊稱為「香港的女兒」嘅馮寶寶，早前承認結束第二段婚姻、且已離婚兩年，然後鋪路復出，準備咗一籃子嘅計劃，其中一個係幫33歲大仔招啟宗籌備，搭膊頭搵咗金像影后惠英紅做電影女主角，自己又客串埋一份。

難怪寶寶姐喺一個專訪入面提到呢世人成身債，佢由童星數起，講番自己細個，月入兩萬，當時嘅錢夠買一層廣播道單位，但係馮峰就將所有錢輸清光，父母離異，為咗佢呢隻金蛋，仲鬧上法庭，最後嘅結果簡直係晴天霹靂，寶寶姐生母話佢知馮峰原來唔係佢親生老竇，搞到佢16歲入住精神病院，患有「暫時性精神崩潰」。

寶寶姐喺低潮嘅時候，以為遇上白馬王子招再強，極速誕下兩子：大仔招啟宗和細仔招啟正，才發現前夫金玉其外敗絮其中，周圍問人借錢，仲欠下巨債，兩個仔就因為前夫迫佢喺離婚協議書上寫自己有精神病，所以無咗兩個仔嘅撫養權，亦令馮寶寶曾想不開，想一死了之。

由於自小同媽媽唔喺一齊生活，加上對寶寶姐嘅誤解，所以寶寶姐覺得佢同兩個仔嘅關係好疏離，雖然係咁，寶寶姐依家同大仔一齊住，仲出盡力幫大仔圓導演夢，媽媽始終都是最偉大的！

至於今次呢部戲，係一部關於女星悲涼史，以阮玲玉同林黛兩位女星故事作藍本，亦包括馮寶寶本人嘅故事。