煲呔誓言,香港要發展六大產業,但講到最受中央同特區政府重視嘅,相信依然都係地產業,否則國務委員劉延東噚日朝早接見特區政商界人士時,都唔會咁罕有咁一次過見晒香港四大地產商,包括長實嘅李嘉誠、恒地四叔、新地郭老太同新世界彤叔;幾大地產商仲帶埋第二代「覲見」劉延東,含住金鎖匙出世嘅第二代果然零舍不同。
懶理「官商勾結」嘅罪名幾咁嚴重,劉延東噚日朝喺下榻酒店同全國政協副主席董建華同董太共晉早餐後,旋即接見特區四大地產商,超人李嘉誠帶長子李澤鉅出席、四叔李兆基就有囝囝李家誠陪伴,鄭裕彤就同埋個仔鄭家純出席,至於新地就由主席郭老太鄺兆卿帶住兩個仔郭炳江、郭炳聯到場,但作為政協常委嘅大K郭炳湘就唔見影,好可惜郭家仲未全家總動員出場。