李八方online︱立法會「完善」咪兜 維持「高度自治」 失展示咪牌自由
蘋果日報 2021/03/12 21:35
完善立法會咪兜高度自治
立法會選舉制度都被閹割，議會內只能有一種聲音，傳媒採訪自由又點能倖免？立法會今日（12日）出通告話「優化（香港人叫改善，內地人叫完善）」採訪設施，主要係針對會議廳外嘅咪兜。話就話維持「高度自治」，但係以後傳媒「不需要」喺咪兜放咪，即係連展示咪牌嘅自由都冇咗，咁就係「優化」喇。
講返都成6年前，立法會秘書處引入可調校高度嘅咪兜，方便高矮參差嘅議員用。今日秘書處就宣佈會換咪兜，除咗繼續有「高度自治」外，咪兜本身有埋收音裝置，傳媒可以唔使喺咪兜擺咪，直接由sound box攞聲就得。
即係呢，可能以後大家都見唔到，議員面前有各式各樣傳媒咪牌，顯示位議員接受緊好多不同傳媒訪問嘅畫面。意思係咪議會內只有一種聲音，傳媒都唔應該有咁多間咁解？定係議員肯接受傳媒訪問經已皇恩浩蕩，仲咁多要求做乜呀？
秘書處就話，用呢個新咪兜都係想提升議員受訪時嘅音質，同埋應付不斷增長嘅媒體需求，而用呢個咪兜亦考慮咗本地傳媒代表嘅意見同實際需要。總之成套嘢嘅使費係幾萬蚊，遲吓立法會2樓外嘅咪兜都會換埋新咪兜。
立法會「優化」咗個咪兜，維持「高度自治」，但傳媒可能冇得再放咪。
立法會秘書處當年經兩年「研發」後，15年推出製成品呢個「高度自治」嘅咪兜，當時有人笑稱，身高如民主黨「鐵頭仁」，都可以享受到呢個咪兜，亦保持咗舊有咪兜咪牌「百花齊放」嘅傳統。資料圖片
舊咪兜「高度自治」嘅意思…資料圖片
2014年，即係「高度自治」之前嘅咪兜係咁樣，高度固定。資料圖片
都係以仁哥做「比例尺」，一睇便知「高度自治」嘅咪兜有幾好。資料圖片
-----------------------------
《蘋果》英文版免費試睇：了解更多
-----------------------------
支持蘋果深度報道，深入社區，踢爆權貴，即Like蘋果專題及調查組FB專