超級星爸拿華波爾（LaVar Ball）透露，二囝利安哲奴波爾（LiAngelo Ball）同埋三囝拿美路波爾（LaMelo Ball）都已經同經理人簽約，兩位公子嚟緊將會齊齊去海外打波，粉碎咗細囝會喺美國打大學籃球嘅報道。

波爸話：「我根本就唔在乎錢，我希望佢哋去一個地方，效力一隊會同一時間畀佢兩個一齊上陣嘅球隊，最重要嘅係佢兩個打埋同一隊。拿美路係唔會打大學籃球㗎喇！」二波同三波簽約嘅經理人Harrison Gaines同時亦係大佬朗素波爾（Lonzo Ball）嘅agent，消息人士指喺歐洲同亞洲都有幾支球隊對兩位公子有興趣。

波爸繼續強調：「我唔知合約詳情同人哋嘅開價係乜，呢啲全部由經理人處理，我知有幾支球隊係有興趣，我只係需要佢兩個打番波就得。」呢位超級星爸因為不滿UCLA遲遲唔公佈因為喺中國偷嘢被捕嘅二囝要停賽幾耐，索性幫佢退學。至於三囝拿美路早前亦都喺就讀嘅高中退學，當時波爸話自己會喺屋企教阿囝。

--------------------
係你！打造星級球隊，征服各地聯賽！立即加入『BFB CHAMPIONS 2.0』！ http://bit.ly/2xrTKGM