被喻為本港銀行界「教父」嘅利國偉爵士，自從04年4月退任恒生銀行（011）榮譽董事長之後，幾乎絕迹公開場合。噚日佢興致勃勃出席咗一個生日會，邊個咁犀利邀得教父出山？咪就係恒生75歲生日囉！利sir作為「恒生三老」之一，坐住輪椅都要到會展，撐恒生鑽禧慶典。
久未露面嘅利sir，教父地位無人能及，入場時除咗有夫人同看護睇實，恒生副董事長兼行政總裁柯清輝、董事長錢果豐、董事陳祖澤等，都親自迎接。多位官商猛人，一抵達會場，不約而同第一時間朝聖，包括金管局總裁任志剛、滙豐大班二班鄭海泉及霍嘉治、瑞安房地產（272）主席羅康瑞、賭王何鴻燊等，就連主禮嘉賓特首曾蔭權，入到會場都即時見一見呢位godfather，爭在未跪地錫手！

縱橫政經界40年

縱橫政經界四十載嘅利國偉，可以話係本港殿堂級人馬，利sir除咗係恒生元老之一，又做過聯交所主席，83年以行政局議員身份，協助當時財爺彭勵治制訂聯滙政策，84年中英談判期間，佢同鄧蓮如、鍾士元聯袂訪京，會見已故領導人鄧小平，陳情香港面對嘅信心危機。
利老雖然八十有九，但噚日坐喺輪椅上仍然精神奕奕，當然中途小睡片刻在所難免，但一見到特首又成個生猛晒，仲同煲呔有講有笑。

心繫恒生50載

利sir心繫恒生超過50年，佢曾經講過，最刻骨銘心一役，莫過於1965年出售恒生五十一巴仙股權畀滙豐，作為恒生少數識得「番文」嘅高層（時任副總經理），談判亦由佢一手包辦，最終力挽狂瀾，將恒生由地道華資行，搖身變成英資銀行附屬成員，發展至今，成為全球第48大銀行，盈利由1933年的1萬銀，增加到嚿年嘅182億銀，股價仲跑贏阿媽滙豐㖭。
講番恒生75周年酒會，認真冠蓋雲集，嘉賓超過3300名，除咗特首，三司──政務司司長唐英年、財爺曾俊華同律政司司長黃仁龍齊齊亮相，仲有前任一哥曾蔭培、現任一哥鄧竟成到賀，商界有彤叔、糖王郭鶴年，同東亞銀行（023）寶哥哥。至於恒生創辦人家眷──何添太座及何善衡家人，亦嚟見證呢個歷史時刻。

電郵：mailto:[email protected]